Qendra e Shërbimeve Arsimore me propozim të kryeministrit Edi Rama pritet të transformohet në një Agjenci me autonomi organizative dhe financiare. Në projektligjin e hedhur për konsultim publik deri më 8 gusht, kërkohet që QSHA-ja e cila ka përgjegjësi maturën, provimet për profesionet e rregulluara, diplomat e arsimit të lartë e parauniversitar, nga një institucion në varësi të ministrisë së arsimit të marr formën e një Agjencie me qëllimin e përmirësimit të shërbimeve. Në përbërje vec drejtorit të përgjithshëm synohet të ketë këshillin drejtues me 5 anëtarë, ku 2 prej tyre do të jenë mbikqyrës nga ministria e arsimit, 2 do të jenë përfaqësues nga organizata jofitimprurëse dhe një anëtar duhet të jetë ekspert me përvojë ndërkombëtare. Ky model shpjegohet në dokumentin e siguruar nga Top Channel se vjen i bazuar nga praktikat më të mira në vendet e zhvilluara si dhe është rekomandim i ekspertëve britanikë të Cambrige, të cilët pasi kryen studimin në terren propozuan shndërrimin e QSHA në Agjenci të pavarur që të sigurojë cilësi më të lartë të vlerësimeve kombëtare dhe procese më efikase.