Qindra mijëra njerëz protestuan në Beograd të shtunën, në tubimin që konsiderohet si kulmi i protestave disamujore kundër presidentit populist, Aleksandar Vuçiç, dhe qeverisjes së tij. Turma të mëdha të njerëzve që protestonin me flamuj bllokuan rrugët e kryeqytetit, pavarësisht reshjeve të herëpashershme të shiut. Pas incidenteve sporadike mes protestuesve dhe policisë, studentët – të cilët kanë organizuar protesta paqësore prej katër muajsh – bënë thirrje për fund të protestës të së shtunës, duke thënë se nuk mund të garantonin më shumë sigurinë e të gjithëve. Ata më vonë u kthyen nëpër fakultete për të kaluar natën, teksa një pjesë e konsiderueshme e protestuesve u tërhoqën, por mijëra të tjerë mbetën rrugëve në kohën kur nisën tensionet. Për këto tensione, kryeparlamentarja Ana Bërnabiç u shpreh se “janë ekstremistë që sulmuan studentët protestues, por edhe studentët e ‘Parkut të Pionierëve’”.