Vendimi i Donald Trump për të pezulluar për 90 ditë tarifat e shpallura më parë shënon një ndryshim të papritur në strategjinë tregtare të SHBA-së. Sipas ekspertëve, ky veprim nuk është i rastësishëm, por pjesë e një loje të ndërlikuar negociatash, ku tarifat përdoren si levë për të arritur qëllime financiare dhe gjeopolitike, përfshirë sigurimin e blerjeve të borxhit amerikan nga vende si Kina. Ekspertët si Antonio Cesarano që analizojnë dinamikën dhe tregjet makroekonomike globale theksojnë se tensionet në tregun e obligacioneve dhe vështirësitë në rifinancimin e borxhit kanë ndikuar më shumë sesa luhatjet e bursës në këtë vendim të Trump. Ky ndryshim vjen në një moment delikat, ku SHBA po përballet me rritje të ndjeshme të borxhit pas pandemisë dhe luftës në Ukrainë. Vetë Trump e ka pranuar rëndësinë e tij duke deklaruar publikisht: “Po e shikoja tregun e obligacioneve, tani po që është i bukur”. Përplasja SHBA-Kinë do të mbetet boshti kryesor i tensioneve globale, që nga tregtia e deri te financat dhe gjeopolitika, sidomos çështja e Tajvanit. Sa i përket qëllimeve të Trump, besohet se ato janë më shumë të orientuara nga opinioni i brendshëm amerikan. Presidenti po përpiqet të mbështesë elektoratin e vet përmes premtimeve për ulje taksash dhe reduktim të angazhimeve ndërkombëtare të SHBA-së, duke lënë pas dore rolin tradicional të vendit si “kujdestar global”. Kësisoj, tarifat duken më shumë si një mjet presioni për të arritur qëllime të tjera – qoftë tregtare, qoftë fiskale. Në përfundim: pezullimi i tarifave nuk është një shenjë e zbutjes së konfliktit tregtar, por një kapitull i ri në një përballje që duket se do të vazhdojë me faza të alternuara tensioni dhe negociatash.