Një puthje mes dy kolegëve policë në Vlorë iu kushtoi të dyve pezullimin për disa kohë nga detyra e më pas transferimin. Por, historia mes të dyve duket të mos jetë mbyllur me kaq. Agjencia e Mbikëqyrjes Policore e ka shpallur në kërkim efektivin, Festim Xhafa pasi rezulton që në datë 3 maj të ketë përplasur me automjetin e tij ish-kolegen e komisaritatit të Vlorës, Viola Çuka. Ngjarja ka ndodhur përgjatë Bulevardit kryesor të Himarës, ndërsa pas aksidentit Festim Xhafa është larguar me shpejtësi për ta braktisur më pas automjetin në Vlorë. Sipas Agjencisë së Mbikqyrjes policore, mbi policin Xhafa rëndojnë disa vepra penale si përndjekje, dhunë në familje dhe mosbindje ndaj urdhrit të punonjësit të policisë. Mes të dyve dyshohet të ketë pasur një lidhje intime që shkaktoi pezullimin e të dyve nga detyra në korrik të vitit 2022, kur në rrjetet sociale u publika një foto, teksa dy efektivët putheshin brenda automjetit të policisë në shërbim. Pezullimi zgjati pak kohë dhe Festim Xhafa u transferua në komisariatin e Himarës, me detyrë inspektor, ndërsa Viola Çuka rinisi punë në drejtorinë e policisë së Vlorës si punonjëse e policisë së rendit. Ndarja, dyshohet të jetë bërë shkak për përndjekjen dhe përplasjen e polices nga ish-kolegu. Ishte kjo e fundit që pas aksidentit e kallëzoi penalisht Festim Xhafën në polici.