Një debat i ashpër është zhvilluar gjatë një mbledhjeje të fundit të Akademisë së Shkencave, mes profesorit të njohur Artan Fuga dhe kryetarit të Akademisë, Skënder Gjinushi. Diskutimi u fokusua mbi raportin vjetor të institucionit, ku profesori Fuga shprehu kritika për ecurinë e shkencës shqiptare dhe mënyrës se si janë trajtuar vështirësitë që po kalon ajo. “Ne këtu kemi vetëm suksese, por shkenca në Shqipëri ka probleme. Kritika është thelbësore për përmirësimin e punës shkencore, ndërsa raporti juaj nuk përmban asnjë analizë mbi vështirësitë ekzistuese” Fuga shtoi se Akademia duhet të jetë më e hapur dhe të përfshijë më shumë transparencë, duke theksuar se raporti nuk mund të paraqitet si një “propagandë” për të fshehur problemet që ndodhen në fushën shkencore. Ai ka ngritur shqetësimin për shpërdorim, duke thënë se në disa projekte ka mbifaturim.