Rreth 20 persona mbetën të plagosur të hënën në një qendër tregtare luksoze në lagjen e njohur Ginza të Tokios, pasi një burrë spërkati një substancë ende të paidentifikuar pranë një bankomati, duke shkaktuar panik dhe ndërhyrje masive të forcave të emergjencës. Sipas policisë së Tokios dhe shërbimeve zjarrfikëse, incidenti ndodhi në katin përdhes të kompleksit tregtar, një nga zonat më të frekuentuara dhe luksoze të kryeqytetit japonez. Qytetarët raportuan fillimisht një erë të fortë kimike, ndërsa shumë persona nisën të ankoheshin për vështirësi në frymëmarrje, djegie në fyt dhe irritime të syve. Shumica e të lënduarve pësuan simptoma të lehta, kryesisht irritim në fyt dhe probleme të përkohshme me frymëmarrjen, ndërsa autoritetet konfirmuan se nuk ka persona në gjendje kritike për jetën. Disa prej tyre morën ndihmën e parë në vendngjarje, ndërsa të tjerë u transportuan në spitale për kontrolle të mëtejshme. Pas alarmit, zona përreth qendrës tregtare u izolua menjëherë nga policia, ndërsa dhjetëra automjete emergjence dhe ekipe speciale mbërritën në vendngjarje. Pamjet e transmetuara nga mediat japoneze treguan ekipe shpëtimi të pajisura me kostume mbrojtëse dhe maska speciale, teksa evakuonin qytetarët dhe kryenin kontrolle për praninë e substancave të rrezikshme. Një grua 70-vjeçare, e cila ndodhej pranë bankomatit në momentin e incidentit, tregoi për mediat japoneze se ndjeu menjëherë simptoma të forta sapo iu afrua zonës. “Kur mbërrita, kishte shumë rrëmujë dhe mendova se kishte ndodhur ndonjë zjarr i vogël. Sapo shkova pranë bankomatit, fyti filloi të më kruhej dhe më mpihej. Njerëzit përreth nisën të largoheshin me panik”, deklaroi ajo. Sipas dëshmitarëve, disa persona nisën të kolliteshin dhe të kërkonin ndihmë menjëherë pas përhapjes së substancës, ndërsa punonjësit e sigurisë së qendrës tregtare urdhëruan evakuimin e menjëhershëm të zonës. Autoritetet japoneze kanë nisur një hetim të gjerë për të përcaktuar natyrën e substancës së përdorur dhe motivet e autorit të dyshuar. Deri tani nuk janë bërë publike detaje mbi identitetin e tij apo nëse bëhet fjalë për një sulm të planifikuar. Ngjarja ka shkaktuar shqetësim të madh në Tokio, veçanërisht pasi lagjja Ginza konsiderohet një nga zonat më të sigurta dhe më të frekuentuara nga turistët dhe biznesmenët.