Një i vdekur, tetë të plagosur, qindra banorë të evakuuar dhe dhjetëra banesa të shkrumbuara nga flakët. Është ky bilanci tragjik nga zjarret që kanë përfshirë të gjithë vendin, ndërsa flakët kërcënojnë banesat nga veriu në jug. Pamje apokaliptike vijnë nga qyteti i Delvinës, aty ku zjarri ka dalë jashtë kontrollit duke djegur banesa, ndërsa flakët po iu afrohen puseve të gazit, duke ngritur alarmin për një katastrofë të mundshme. Flakët kanë rrethuar qytetin nga veriu dhe lindja, duke detyruar policinë të evakuojë me dhjetëra banorë, ndërsa zjarri po i afrohet edhe spitalit, duke bërë që të sëmurët të strehohen në kinoteatrin e qytetit. Në zonë po punojnë dhjetëra forca të ushtrisë dhe zjarrfikëses. Pranë spitalit, janë marrë masa urgjente për çmontimin dhe largimin e sistemit të furnizimit me oksigjen, për të shmangur rrezikun e një shpërthimi në rast se flakët arrijnë godinën. I gjithë personeli mjekësor është në gatishmëri për të mbrojtur ambientet me mjetet që kanë në dispozicion, ndërkohë që çdo pacient është evakuuar në ambiente të sigurta.