Sekretari i përgjithshëm i NATO-s, Mark Rutte, ka thënë se si shef i Aleancës së Atlantikut të Veriut nuk komenton mbi marrëveshjen trepalëshe të mbrojtjes mes Kosovës, Shqipërisë dhe Kroacisë. Në një konferencë për media në Bruksel, Rutte ka thënë se stabiliteti në Ballkanin Perëndimor është shqetësim i madh për NATO-n andaj edhe janë prezentë me forcat e KFOR-it. “Stabiliteti në Ballkanin Perëndimor është shqetësim i madh. Kjo është arsyeja pse NATO-ja është e pranishme në Kosovë dhe gjithashtu në Bosnje dhe Hercegovinë. Ne kemi pesë aleatë, Malin e Zi, Shqipërinë, Maqedoninë e Veriut, Kroacinë dhe Slloveninë, dhe të gjithë po punojmë ngushtësisht së bashku”, ka thënë ai. Sekretari i përgjithshëm i NATO-s, ka ritheksuar se autorët e sulmit në Banjskë dhe atij ndaj pjesëtarëve të KFOR-it në veri në vitin 2023 duhet të dalin para organeve të drejtësisë, dhe se për këtë duhet të punojë Serbia. Rutte ka thënë se duhet bërë përpjekje që situata në Kosovë të mbetet e qëndrueshme. “Situatën e sigurisë në Kosovë e ndjekim nga afër në mënyrë sistematike që nga 1999. Tani gjendja është shumë më e qëndrueshme dhe kështu të vazhdojë. Sa i përket Banjskës dhe sulmit ndaj trupave të KFOR-it, serbët duhet të punojnë për të nxjerrë përgjegjësit para drejtësisë. Kam folur për këtë me Vuçiçin në telefon, por edhe kur drekuam në Bruksel dy javë më parë”, ka theksuar Sekretari i NATO-s.