Është nënshkruar këtë të premte marrëveshja mes Bankës së Shqipërisë, Bankës së Italisë dhe 3 bankave qendrore të vendeve të Ballkanit Perëndimor për krijimin e një sistemi pagesash të shpejta. Në bazë të kësaj marrëveshjeje, Banka e Italisë do të ofrojë për vendet e Ballkanit Perëndimor një sistem pagesash të shpejta bazuar në një kopje të shërbimit TIPS, e cila është platforma evropiane për shlyerjen e pagesave në kohë reale. Puna për këtë platformë do të nisë në javët e ardhshme, ndërsa pritet të jetë funksionale brenda 18 muajsh. Sipas vlerësimit të Bankës së Shqipërisë, përdorimi i pagesave të shpejta mund t’i kursejë qytetarëve, bizneseve, aktorëve të tregut dhe ekonomisë shqiptare rreth 35-40 miliardë lekë. Përmes sistemit të pagesave të shpejta, qytetarët mund të kryejnë menjëherë pagesa në markete dhe biznese të tjera përmes një kodi, që mund ta skanojnë nëpërmjet telefonit të tyre. Ndërsa me transfertat e rregullta bankare zakonisht duhet të paktën një ditë punë që paratë të arrijnë në llogarinë bankare të marrësit, me pagesat e shpejta, transferimi i parave është pothuajse i menjëhershëm midis llogarive bankare. Banka e Shqipërisë vlerëson se adoptimi i një sistemi pagesash të shpejta sjell një sërë përfitimesh në nivel kombëtar, duke filluar me nxitjen e efikasitetit të ekonomisë, rritjen e përfshirjes financiare dhe reduktimin e ekonomisë informale.