Ecuria aktuale e ekonomisë dhe stabiliteti i cmimeve kanë bërë që Banka e Shqipërisë të vijojë të mbajë të pandryshuar normën bazë të interesit në nivelin e 2.5%. Në një deklaratë për mediat Guvernatori Gent Sejko deklaroi se qëndrimi aktual i politikës monetare është i qëndrueshëm për ekonominë vendase. “Këshilli Mbikëqyrës i Bankës së Shqipërisë vendosi: të mbajë të pandryshuar normën bazë të interesit, në nivelin 2.50%; të mbajë të pandryshuar normën e interesit të depozitës njëditore, në nivelin 1.50%. të mbajë të pandryshuar normën e interesit të kredisë njëditore, në nivelin 3.50%.” Inflacioni shënoi një rritje të lehtë në muajt korrik e gusht, duke arritur në nivelin 2.4%, nga 2.3% në tremujorin e dytë. Kjo ecuri u ndikua kryesisht nga rritja e çmimit të qirave dhe stabilizimi i çmimit të naftës. Nga ana tjetër, inflacioni i çmimeve të ushqimeve vijoi të bjerë, ndërsa çmimet e mallrave dhe të shërbimeve të tjera mbetën relativisht të qëndrueshme.” Guvernatori vlerësoi rritjen ekonomike në tremujorin e dytë ndërsa I cilësoi pozitive ecurinë e treguesve të punësimit dhe papunësisë. “Në tërësi, zgjerimi i kërkesës për mallra e shërbime është pasqyruar edhe në dinamikat e tregut të punës. Në tremujorin e dytë, punësimi në sektorin privat jobujqësor u rrit me 3.4%, papunësia totale ra në nivelin 8.5%, ndërsa pagat e sektorit privat u rritën me 9.5%. Tendenca e rritjes së pagave në sektorin privat gjatë viteve të fundit reflekton si kërkesën e lartë për punë, ashtu edhe mungesën e fuqisë punëtore. “