Pas rritjes së cmimit të naftës në Shqipëri si pasojë e rritjes së këtij produkti në tregjet ndërkombëtare dhe lajmërimit nga shoqata e hidrokarbureve për një rritje të kostove të importeve, Autoriteti i Konkurencës ka zbritur në terren për të hetuar abuzimet. Të gjitha ndërmarrjet që ushtrojnë veprimtarinë e tregtimit të karburanteve kryesisht ato me pakicë janë aktualisht nën monitorim nga Autoriteti. “Në praktikë, çmimet e karburanteve në tregjet ndërkombëtare përditësohen në mënyrë të vazhdueshme, duke reflektuar faktorë si oferta, kërkesa, kostot e përpunimit, si dhe zhvillime të tjera ekonomike apo gjeopolitike. Si rrjedhojë, sipas standardeve të konkurrencës së ndershme, pritet që luhatjet e çmimeve në tregun vendas të ndjekin të njëjtin drejtim dhe të jenë proporcionale me masën e ndryshimeve që regjistrohen në bursë. Çdo devijim i pajustifikuar, qoftë edhe rritje e pakoordinuar por më e shpejtë apo më e theksuar se ecuria e çmimeve ndërkombëtare, përbën tregues të mundshëm të sjelljeve jo konkurruese në treg.” Sipas Autoritetit cdo spekulim do të ndiqet sipas masave përkatëse. “Në rast se vërehen luhatje të çmimeve që tejkalojnë masën e ndryshimeve të çmimeve në bursat ndërkombëtare, Autoriteti, në zbatim të ligjit nr. 9121/2003, do të ndërmarrë masat e nevojshme sipas kompetencave të tij” Rritja e cmimeve u vërejt vetëm në disa prej pikave të karburanteve që prej datës 3 shkurt me një rritje prej 4 lekësh ndërsa Shoqata e Hidrokarbureve bën të ditur se nafta e importuar dhe kostot e saj është shtrenjtuar edhe më tej.