Qeveria po vlerëson mundësitë që duke nisur nga janari i vitit të ardhshëm qytetarët shqiptarë të kenë një çmim më të ulët të energjisë elektrike. Ministrja e Infrastrukturës dhe Energjisë, Belinda Balluku bëri të ditur se kjo do të bëhet e mundur përmes optimizimit të proceseve teknike dhe financiare të kompanive shtetërore të energjisë. “Siç e ka thënë edhe Kryeministri Rama, ne kemi marrë një porosi dhe prej kohësh punojmë me OSHEE-në, KESH dhe OST-në për të vlerësuar një ulje të energjisë elektrike duke nisur nga 1 janari i vitit 2025. Jemi në punë e sipër, në analizë e sipër, por jemi të sigurtë që do t’ia dalim që duke optimizuar proceset teknike edhe ato financiare të kompanive tona ne të kemi mundësi që nga 1 janari ti ofrojmë qytetarëve shqiptarë një çmim më të mirë për energjinë elektrike” Ministrja Balluku vizitoi sot mjediset e OSHEE-së, ku janë vendosur punonjësit e call centerit që do të funksionojë 24 orë në 7 ditë të javës. Përmes call centerit qytetarët mund të paraqesin ankesa, të raportojnë mbi problematika të caktuara apo të kërkojnë informacion mbi shërbime të ndryshe që kompania ofron. “Inovacioni sjell transparencë. Këtu kemi të bëjmë me abonentët të cilët kanë shumë të drejtë që të kenë dhe dyshimet e tyre mbi faturimin dhe mbi proceset teknologjike që ne kemi brenda OSHEE-së, ndaj inovacioni, dixhitalizimi sjell transparencë të plotë.”