Një udhëzim i ri ka dalë për të gjithë individët që merren me shit-blerjen e pronave. Tatimet njoftojnë se ndërtuesit apo investitorët që janë të pajisur me NIPT dhe regjistrohen në QKR nuk do paguajnë tatimin 15% mbi të ardhurat personale, por vetëm taksat vendore për pasuritë e paluajtshme, në momentin që duan të shesin, dhurojnë apo heqin dorë nga pronësia. Nga krahu tjetër, për të ndalur abuzimet Tatimet njoftojnë se investitorët që nuk kanë NIPT të regjistruar dhe shesin prona do paguajnë edhe tatim mbi të ardhurat edhe taksat vendore. Ky rregull vlen edhe për individët që pajisen me NIPT gjatë procesit të shitjes, por edhe për ata që lejen e ndërtimit e kanë si individë, por në momentin e shitjes pajisen me NIPT.