Për të arritur objektivin Shqipëria e 2030 në Bashkimin Europian, administrata publike po forcon jo vetëm mekanizmat e transparencës dhe profesionalizmit; por pritet që të kthehet dhe në një administratë të gjelbër. Në draf-strategjinë për reformën në administratën publike kërkohet që deri në 2028 punonjësit të kenë reduktuar përdorimin e letrës në komunikimet zyrtare, duke i zëvendësuar me shkresa elektronike. Në dokument parashikohen ndryshime të tjera ligjore; me qëllimin e përzgjedhjes së nëpunësve me meritë, të painfluencuar nga aktorë dhe faktorë të jashtëm, që punojnë me efikasitet dhe motivim si dhe të kryejnë trajnime të vazhdueshme e gjithpërfshirëse. ‘Nëse i referohemi pjesës së emigracionit të punonjësve që largohen në tregje ndërkombëtare, janë së pari pagat dhe së dyti kushtet e punës e për tu rritur në karrierë. Me këtë draft duket se po korrigjohen këto problematika, e nis administrata publike duke i dhënë një shembull të mirë e sektorit privat. Ne jemi një vend që jo vetëm po përmirësojmë aspektin legjislativ prej integrimit në BE, por që patjetër duhet të vimë me një administratë publike që është sa më afër kushteve të Bashkimit Europian e me nënpunës të kualifikuar’-shprehet Romina Radoshiqi, eksperte ekonomie. Draft strategjia parashikon investime në motivimin e mirëqënien e nëpunësve publikë, duke i përkrahur edhe me shpalljen e “punonjësve të dalluar”. Ndërsa priten ndryshime në strukturën e pagave si dhe shpërblime financiare; elementë që duhen mbështetur sipas ekspertëve. ‘Tashmë kemi një strategji të përcaktuar mirë se si do të matet performanca e punonjësve duke u afruar më tepër në meritokraci. Ky është element shumë pozitiv që administrata dëshiron të punësojë më të mirët. Matja e performancës do të ndikojë edhe në produktivitetin e punonjësve. Do shihen edhe rritja e stimujve materialë dhe jo materialë që ndikon në motivimin e kënaqësinë në punë’. Duke nisur prej vitit 2026 planifikohet një metodologji e re e vlerësimit të pozicioneve të punës, ndërsa do të fillojë edhe pilotimi i punës hibride, duke i dhënë mundësi administratës të punojë në distancë. “Qëllimi i punës në distancë është që ti të kryesh punën në ambientin që ti do, por je i detyruar të përfundosh detyrat që të janë caktuar. E shoh lehtësi sepse nuk do të kemi probleme me performancën apo mbingarkesë për kolegun tjetër. Lehtëson ata që janë familjarë”.