NATO-ja do të dislokojë në Kosovë e Maqedoninë e Veriut gati 200 trupa nga Forcat e reja Aleate të Reagimit, ARF, e para herë që trupa të tilla zhvendosen që prej krijimit të kësaj force në muajin korrik. Në një njoftim të aleancës shpjegohet se dislokimi i trupave në fjalë në të dy vendet bëhet nga 30 shtatori deri më 16 tetor, për stërvitje që synojnë “gatishmërinë e tyre dhe mbështetje për KFOR-in”. Në Kosovë do të mbërrijnë 50 trupa të Ekipit Operacional të Ndërlidhjes dhe Zbulimit (OLRT) të ARF-së, ndërsa 150 të tjera do të shkojnë në Maqedoninë e Veriut. “Personeli i dislokuar do të performojë aktivitete stërvitore për të mbajtur në nivel të lartë gatishmërinë dhe për të testuar aftësitë e tyre dhe procedurat për dislokim të shpejtë të një force të madhe. Një pjesë e selisë së ARF-së do të integrohet përkohësisht në komandën dhe strukturat kontrolluese të misionit të KFOR-it dhe do të ketë për detyrë që të identifikojë kërkesat e mbështetjes logjistike, mbështetjen infrastrukturore dhe operacione për KFOR-in në rast të nevojës për një përforcim të pranisë së tij”, theksohet në njoftim. Dislokimi i fundit, së bashku me zhvendosjet e mëhershme të bëra gjatë këtij muaji ji në Kosovë të Forcave Strategjike Rezervë (SRF), përcjellin sipas aleancës, mesazhin se “qartë të vendosmërisë të fortë të NATO-s dhe përkushtimit për të ruajtur paqen dhe stabilitetin në rajon, por edhe aftësinë e saj dhe gatishmërinë për t’u përgjigjur”. Më herët sakaq, u njoftua se trupat britanike “shkruan historinë” duke u bërë të parat forca të NATO-s që do të vendosen përgjatë një rruge të rëndësishme të Ballkanit, duke testuar kështu korridorin e ri strategjik të NATO-s.