Këngëtarja amerikane Taylor Swift i është bashkuar Elon Muskut në listën e personave më të pasur në botë. Ylli amerikan ka hyrë në Listën e Miliarderëve, të përpiluar prej revistës Forbes, për herë të parë, pas regjistrimit të një pasurie prej 1.1 miliard dollarësh. Ajo ka marrë statusin e megayllit dhe këtë vit është bërë performuesja e parë që e ka fituar çmimin për albumin më të mirë për herë të katërt. Në listë këtë vit ka hyrë edhe Sam Altman, krijuesi i aplikacionit ChatGPT, me një pasuri prej 1 miliard dollarësh. Bernard Arnault dhe familja e tij, që qëndrojnë mbrapa kompanisë franceze të mallrave luksoze LVMH, e kryesojnë listën e revistës Forbes me një pasuri prej 233 miliardë dollarëve. Musk, pronari i kompanive Tesla dhe X, i njohur më parë si Twitter, është renditur i dyti, me një pasuri prej 195 miliardë dollarësh. Në vendin e tretë është pronari i kompanisë Amazon, Jeff Bezos. Forbes ka thënë se klasa e miliarderëve më 2024 është 255 për qind më e pasur sesa një dekadë më parë, që nënkupton se 0.5 për qind e 2.781 miliarderëve të botës gëzojnë 14 për qind të pasurisë së të gjithë miliarderëve. Në aspektin gjeografik, SHBA-ja ka më shumë miliarderë sesa çdo shtet – 813 – e përcjellë nga Kina dhe India. Sipas Forbes, në vitin 2024 është regjistruar një rekord i miliarderëve, plot 2.781. Elita botërore është më pasur se kurrë dhe e ka një pasuri kolektive prej 14.2 trilionë dollarëve.