Një skandal ka përfshirë Federatën Shqiptare të Futbollit, pasi një mbikëqyrës shqiptar që ndodhej në kampin stërvitor ku Kombëtarja po akomodohej pranë Dortmundit, ka ngacmuar seksualisht një punonjëse. Sipas prestigjiozes gjermane “Bild” mbikëqyrësi është 26 vjeç, ndërsa e dhunuara 18 vjeçe. Në denoncimin e bërë, ajo i tha policisë se shqiptari e kishte futur me forcë në kuzhinë, e kishte puthur dhe ngacmuar seksualisht. Edhe pse prokurori u informua menjëherë për veprën e raportuar seksuale, i akuzuari mundi të fluturonte në shtëpi i pangacmuar të nesërmen, pas disfatës së Shqipërisë kundër Spanjës, që shënonte dhe ndeshjen e fundit të kuqezinjve në Europian, raporton Bild. “Duke qenë se nuk ka ende dyshime urgjente, një kërkesë për urdhër arresti nuk është paraqitur sipas ligjit gjerman”, tha një zëdhënëse e organit të akuzës. Aktualisht është e paqartë se si do të vazhdojë hetimi. “Kujdesi ndaj punonjëses dhe mbrojtja e të drejtave të saj personale kanë përparësinë kryesore”, tha një zëdhënësee qendrës ku qëndroi Kombëtarja. Pasi u bë e ditur ngjarja, autori u pezullua menjëherë nga Federata Shqiptare e Futbollit. Identiteti i tij nuk dihet, por theksohet se nuk është as lojtar, as staf dhe as zyrtar i lartë.