Ndërsa çështja e mbetjeve toksike është kthyer në temë e ditës dhe burim për akuza të vazhdueshme ndaj institucioneve, Ministria e Infrastrukturës dhe Energjisë si dhe ajo e Mjedisit kanë reaguar përmes një deklarate të përbashkët për të sqaruar opinionin publik. Duke theksuar se prej momentit të parë të sinjalizimit për mmbetjet e nisura nga porti I durrësit, stukturat shtetërorë nisen menjeherë hetimet në bashkëpunim me Zyrën e Bashkimit Evropian kundër Mashtrimit, Ministria e Infrastrukturës dhe Energjisë dhe ajo e Mjedisit kanë reaguar për të frenuar lajmet e fabrikuara. Do ishte e udhës të prisnim rezultatet e hetimeve, por përkundrejt paudhësisë së atyre që të vetmin instrument mbijetese në tregun mediatik e politik kanë denigrimin e agjencive ligjzbatuese na duhet të reagojmë për opinionin publik, për të vendosur kufirin mes botës reale dhe asaj të fabrikimeve e të akuzave të pandalura. Në deklaratë sqarohet se në të dyja rastet e përfolura të transportit, nga Elbasani drejt Tajlandës dhe nga Kosova drejt Kinës, mallrat e deklaruara si okside/hidrokside hekuri apo koncentrat zinku, janë transportuar nga Porti i Durrësit drejt porteve evropiane përmes linjave kontejnerike ndërkombëtare me reputacion të padyshimtë dhe nuk janë bërë objekte kontrollesh në vendet e BE-së, ku kanë ndaluar dhe janë magazinuar përkohësisht, por janë lejuar të vijojnë itinerarin e tyre. Faktet tregojnë se ngarkesa të tilla janë pranuar rregullisht nga vendet tranzit dhe nga vendet e destinacionit fundor. Më konkretisht rezulton se së fundmi 360 njësi kontejnerike të tilla janë pranuar nga autoritetet doganore kineze vetëm në 10 muajt e fundit. Në çdo rast, theksohet në deklaratën e përbashkët të ministrive, konventat ndërkombëtare, parashikojnë se deklarimi i ngarkesës si mall i rrezikshëm apo mbetje e rrezikshme është detyrim i eksportuesit apo importuesit, çka duhet të evidentohet përmes dokumentacionit shoqërues të mallit nga prodhuesi, analizat dhe autorizimet përkatëse. Edhe në këtë rast,theksohet në deklaratë, janë hetimet e organeve ligjzbatuese ato që do të sqarojnë përgjegjësinë në fjalë. Në këto rrethana, nuk mundet që Shqipëria të pranojë a priori rikthimin e ngarkesave të tilla, aq më tepër vetëm mbi bazën e dyshimeve e të spekulimeve, pa realizimin e analizave shteruese dhe provave ligjore të besueshme dhe të verifikueshme. Ministritë bëjnë apel që të gjithë të presin rezultatet e hetimeve dhe analizave përkatëse, përpara se të bëjnë përgjegjëse agjencitë ligjzbatuese për përpjekjet evidente të dy operatorëve ekonomikë, përkatësisht njërit në Shqipëri e tjetrit në Kosovë, për t’iu shmangur përgjegjësive të tyre.