Taulant Toma, një 41-vjeçar shqiptar me precedentë të mëdha kriminalë, është arratisur sërish nga burgu i sigurisë së lartë i Operas në Milano. Pas 15 vjetësh vuajtjeje të një dënimi të rëndë për krime të ndryshme, si grabitje, vjedhje dhe trafik droge, Toma ka sfiduar përseri autoritetet. Arratisja e tij u konstatua mëngjesin e së dielës, kur gjatë kontrollit rutinë të qelisë, gardianët nuk e gjetën. Hetimet paraprake tregojnë se ai ka prerë hekurat e dritares së qelisë dhe ka arritur të kalojë murin e burgut. Pas arratisjes, nuk janë gjetur ende gjurmë të tij, por autoritetet po analizojnë kamerat e sigurisë për të rindërtuar lëvizjet e tij dhe për të zbuluar vendndodhjen e tij. Ky është episodi i katërt i arratisjes për Toman, i cili ka një histori të gjatë me autoritetet ndërkombëtare. Arratisja e tij e fundit kishte ndodhur në vitin 2013 nga burgu i Parmës, ku ai ishte bashkë me një tjetër të burgosur, Frokaj Vamentin, i cili më pas u vra gjatë një grabitjeje. Toma ishte kapur në Belgjikë, por arratisja e tij e dytë në këtë vend u zhvillua pas disa muajsh, deri në arrestimin e tij në vitin 2015. Autoritetet italiane kanë ngritur një grup hetimor për të zbuluar, se si Toma ka mundur të realizojë këtë arratisje.