Shpresat për një plan paqeje në Ukrainë për momentin janë shuar. Moska kërkon "ndryshime rrënjësore" në planin e paqes të propozuar nga Shtetet e bashkuara. Yuri Ushakov , këshilltari i politikës së jashtme i Vladimir Putinit, i cituar nga mediat ruse deklaroi SHBA-të do të duhet të "bëjnë ndryshime serioze, madje do të thoja rrënjësore, në dokumentet e tyre". Nga ana tjetër po shtohen zërat se SHBAyë mund të ndalojnë së ofruari ndihmë ushtarake për Ukrainën. Djali i madh i presidentit amerikan, Donald Trump Jr. e bëri deklaratën gjatë një forumi në Doha. Sipas the Guardian kur u pyet nëse presidenti amerikan mund të ndërpresë ndihmën ushtarake për Kievin, Trump Jr. u përgjigj se ishte e mundur, duke shtuar se babai i tij është një nga njerëzit më të paparashikueshëm në politikë. Trump Jr., i cili nuk ka asnjë rol në administratë, është megjithatë një figurë e shquar në botën e Maga-s dhe gjithmonë ka kundërshtuar mbështetjen amerikane për Ukrainën. Trump Jr. sulmoi gjithashtu BE-në, duke pretenduar se sanksionet evropiane nuk po funksionojnë. “Plani evropian është le të presim që Rusia të falimentojë, por ky nuk është një plan", u shpreh ai.