30 milionë euro është fatura e OSHEE-së e parashikuar për 2025 që do i kushtojë si rrjedhojë e uljes së çmimit me 1 lek/kw për familjet që shpenzojnë deri në 700 kw/h në muaj. Para propozimit për reduktimin e pagesës së energjisë elektrike vetëm për këtë kategori në 8.5 lek/kw, në tavolinë ekspertësh u parashtruan disa mundësi zgjedhje. “U ngrit grupi teknik për skemën se si këto 30 milionë euro të shkojnë te konsumatori. Skenari numër 1 ishte t’iu shkonte të gjithëve, bizneseve më të mëdha, të vogla e familjarëve, por që reduktimi do ishte më i vogël se 30 milionë euro do shpërndaheshin në shumë klientë. Skenari i dytë do ishte të ulej të gjithë familjarëve dhe skenari i tretë do ishte për këtë kategori familjarësh që efekti do ishte më i ndjeshëm, por edhe që të krijojmë kulturën e familjarit për të përdorur energjinë në mënyrë më kursimtare”, thotë Ceno Klosi. Për zv.ministrin e Energjetikës, 30 milionë euro të munguara në buxhetin e shoqërive që prodhojnë e furnizojnë energji nuk do të jenë penguese për vijimësinë e punës në rrjetin elektrik. Por pse pikërisht u miratua ky vendim tani dhe kush e propozoi? “E gjithë kjo performancë e shoqërive e cila ka arritur të rregullojë të ardhurat, ka dy mënyra kur ato gjenerojnë fitime: o shkojnë për investime, o shkojnë në reduktim çmimi. Ne me investime mund të themi që janë bërë ndër vite investime të konsiderueshme, rrjeti është në situatë komplet tjetër. Kompanitë publike kanë kaluar dhe teste shumë të forta të krizave botërore të energjisë, edhe të kohës së COVID-it që kanë krijuar bindjen te qeveria se janë kompani të konsoliduara. Por as kryeministri, as zv.kryeministrja as zv.ministri askush nuk merr vendimin përveç kompanive se janë ato që mbajnë përgjegjësinë”, shtoi Klosi. Vendimi i miratuar nga ERE për kategorizimin e konsumatorëve duke favorizuar vetëm familjet që përdorin me ekonomi energjinë, është konsultuar prej gjysmë viti për përcaktimin e sasisë maksimale të energjisë për përfitimin e uljes së çmimit. “U mor një analizë se sa do të ishte një sasi energjie normale për një familje që të kishte të siguronte bolierin, gatimin, larje, ujin e ngrohtë e ngrohje minimale me kondicioner dhe u arrit në konkluzion që 700 kw ishin mjaftueshëm. Kjo u vendos si sasia tavan që të bësh pak ekonomi me energjinë që ta përfitosh, pastaj nëse shkon mbi këtë sasi, ke pajisje më shumë, i mban më shumë ndezur, do paguash me çmimin që është”, përfundoi ai. Skema për uljen e çmimit për familjet shqiptare që harxhojnë më pak se 700 kw/h në muaj është gjithashtu një skemë që synon të nxis në kursimin e energjisë elektrike.