Qindra ish-zyrtarë të lartë të sigurisë izraelite, përfshirë ish-drejtorë të agjencive të inteligjencës, i kanë bërë thirrje presidentit amerikan Donald Trump të ushtrojë presion mbi qeverinë izraelite për t’i dhënë fund luftës në Gaza. "Është gjykimi ynë profesional se Hamasi nuk përbën më një kërcënim strategjik për Izraelin," thuhet në një letër të hapur të shpërndarë për mediat të hënën. "Fillimisht kjo ishte një luftë e drejtë, një luftë mbrojtëse, por pasi arritëm të gjitha objektivat ushtarake, kjo luftë pushoi së qeni e drejtë," deklaroi Ami Ayalon, ish-drejtor i shërbimit të sigurisë Shin Bet. Lufta, që po i afrohet muajit të 23-të, "po e çon shtetin e Izraelit drejt humbjes së sigurisë dhe identitetit të tij," paralajmëroi Ayalon në një video të publikuar bashkë me letrën. Letra është firmosur nga 550 persona, përfshirë ish-drejtorë të Shin Bet dhe agjencisë së spiunazhit Mossad, dhe i bën thirrje Trump-it të "udhëheqë" kryeministrin Benjamin Netanyahu drejt një armëpushimi. Letra është firmosur nga tre ish-drejtorë të Mossad-it, firmëtarë të tjerë përfshijnë edhe pesë ish-kreu të Shin Bet-it dhe tre ish-shefa të shtabit të ushtrisë, përfshirë ish-kryeministrin Ehud Barak dhe dy ish ministra te mbrojtjes. Letra argumenton se ushtria izraelite "i ka përmbushur prej kohësh dy objektivat që mund të arriheshin përmes forcës: shkatërrimi i strukturave ushtarake dhe i qeverisjes së Hamasit." "Objektivi i tretë, dhe më i rëndësishmi, mund të arrihet vetëm përmes një marrëveshjeje: kthimi i të gjitha pengjeve në shtëpi Ndjekja e pjesëtarëve të mbetur të Hamasit mund të bëhet më vonë," thuhet në letër. Në letrën drejtuar Trump-it, ish-zyrtarët theksojnë se ai gëzon besim të gjerë tek shumica e izraelitëve dhe mund të ushtrojë presion mbi Netanyahun për të ndalur luftën dhe për të sjellë kthimin e pengjeve. Pas një armëpushimi, argumentojnë firmëtarët, Trump mund të luajë një rol kyç për të imponuar krijimin e një koalicioni rajonal që do të mbështeste një Autoritet Palestinez të reformuar për të marrë kontrollin e Gazës si alternativë ndaj Hamasit.