Është përcjellë sot për në banesën e fundit Ana Dyrmishi, 25-vjeçarja nga Durrësi, e cila humbi jetën pas plagëve të rënda të marra në zjarrin tragjik të hotelit “Brooklyn” në Lungomare të Vlorës.Trupi i saj mbërriti në Durrës, ku familjarë, të afërm dhe miq i dhanë lamtumirën e fundit të resë. Ana kishte shkuar në Vlorë së bashku me të fejuarin e saj, Arnaldon, për të festuar ditën e parë zyrtare të fejesës. Por ajo që duhej të ishte një ditë gëzimi u shndërrua në tragjedi.Në orët e para të mëngjesit të 16 gushtit, zjarri përfshiu hotelin ku çifti po qëndronte. Gjashtë persona mbetën të plagosur, ndërsa Ana pësoi djegie në rreth 85 % të trupit. Pas trajtimit të parë në QSUT, 25-vjeçarja u dërgua në Turqi për mjekim të specializuar, me mbështetjen e qeverisë. Pavarësisht përpjekjeve të mjekëve, ajo u nda nga jeta në spital, duke mos mundur t’u mbijetojë plagëve të rënda. Edhe i fejuari i saj, Arnaldo Kaçorri, me plagë nga djegiet është dërguar në Itali për trajtim të specializuar. Ana jetonte së bashku me familjen në Shkozet. Sot, familja e saj e përcolli për në banesën e fundit, pas një beteje të dhimbshme që nisi më 16 gusht dhe përfundoi tragjikisht në një spital të Turqisë.