Millun Millenkoviç i njohur me nofkën Llune u arrestua këtë të martë nga njësitë speciale të Policisë së Kosovës, pasi protestoi e lëndoi tre policë në Mitrovicën e Veriut. Ministri i Punëve të Brendshme, Xhelal Sveçla, e ka përshkruar Millenkoviçin si “një nga organizatorët e sulmeve ndaj pjesëtarëve të KFOR-it” si dhe prijës të “bandave kriminale ndër vite”. Millenkoviç është një ish-kikboksier që tashmë bën trajnerin e këtij sporti. Ai madje është intervistuar edhe në disa media lidhur me pasionin e tij për boksin, duke folur nga klubi i tij. Sveçla tha se ai është një nga udhëheqësit e formacionit kriminal “Mbrojtja Civile” dhe prijësin e bandave kriminale që ndër vite kanë terrorizuar qytetarët tanë. Llune po ashtu me grupe të organizuara kriminelësh ka sulmuar dhe rrahur të mitur, fëmijë shqiptarë që banojnë në Mitrovicë të Veriut. Llune ka pasur rol aktiv dhe udhëheqës të bandave kriminale në organizimin e barrikadave në shtator 2021, pra gjatë procesit të reciprocitetit të targave. Referuar zhvillimeve të fundit në veri, Llune ka organizuar grupet për të sulmuar objektet e komunave ndërsa specifikisht në Zvecan, Llune ka qenë organizator i sulmeve të grupeve kriminale dhe sulmues direkt ndaj pjesëtarëve të KFOR.