Brenda muajit dhjetor pritet që qeveria të kthejë shumat e tatimit të parapaguar nga profesionistët e lirë. Lajmin e bëri të ditur Ministri i Financave Petrit Malaj në konferencën e përbashkët për shtyp me misionin e FMN-së dhe Bankën e Shqipërisë. Vendimi për kthimin e tatimit të parapaguar pritet të miratohet në mbledhjen e ardhshme të qeverisë. “Nga ana e qeverisë ka vullnet për të kthyer fondet mbrapsht. Ministria e Financave i ka propozuar qeverisë kthimin mbrapsht të fondeve. Besoj se në mbledhjen e ardhshme të qeverisë do të kemi lajm të mirë për profesionet e lira. Brenda muajit dhjetorit 2024 do të kthehen të gjitha shumat e marra nga profesionet e lira dhe do të fshihen të gjitha detyrimet e regjistruara përgjatë periudhës janar-korrik që ishte ligji në fuqi” I pyetur në lidhje me procesin e rivlerësimit të pronave, ministro malaj theksoi se nisma do të miratohet në fillim të vitit të ardhshëm, paralelisht me propozimin për çmimet e reja të referencës në të gjitha bashkitë në vend, përveç Tiranës, pasi çmimet e referencës datojnë nga vitit 2016 dhe nuk reflektojnë çmimet aktuale të tregut.