Një ngjarje e rëndë ka ndodhur në Dhërmi, ku recepsionisti i një hoteli është vrarë me armë zjarri pak minuta pas mesnatës, rreth orës 12:30. Viktima është Eraldo Nevruzi, 31-vjeç nga Tirana. Ndërsa autori është identifikuar si Gerald Shehu, 43 vjeç nga Tepelena. Top Channel mëson se ai është bashkëpronar i hotelit ku ndodhi krimi. Sipas policisë, Shehu e ka vrarë Nevruzin në një nga dhomat e hotelit dhe pasi ka zhdukur trupin, është arratisur drejt vendit fqinj, Greqisë. Dy janë pistat paraprake të hetimit, një për konflikt banal të çastit dhe tjetra për njohje të mëparshme dhe përfshirje në aktivitete të paligjshme në Angli ku të dy, viktima dhe autori jetonin e punonin. Policia e Shtetit ka shpallur në kërkim autorin e dyshuar dhe po bashkëpunon me Policinë greke për të bërë të mundur lokalizimin dhe kapjen e tij. Po ashtu, vijon krehja e zonës për gjetjen e trupit të 31-vjeçarit, ndërkohë që 29 persona, që mund të kenë dijeni për ngjarjen, janë shoqëruar deri në këto momente në polici.