Kombëtarja shqiptare ka nisur përgatitjet për katër ndeshjet e para të Nations League, ndërsa që në ditën e parë të grumbullimit, trajneri Rolando Maran është përballur me dy ndryshime të detyruara në listë. Kuqezinjtë zhvilluan seancën e parë stërvitore në “Shtëpinë e Futbollit”, me 26 futbollistë në dispozicion. Lojtarët që kishin luajtur me klubet e tyre gjatë fundjavës zhvilluan një seancë rikuperimi, ndërsa pjesa tjetër e grupit punoi me ushtrime taktike dhe në palestër. Por shqetësimi kryesor vjen nga mesfusha. Pas Qazim Laçit, i cili u dëmtua dhe u zëvendësua nga Feta Fetai, edhe Adrion Pajaziti është detyruar të largohet nga grumbullimi. Pajaziti, i dëmtuar në muskujt e kofshës së djathtë gjatë ndeshjes së fundjavës me klubin, iu nënshtrua sot kontrolleve mjekësore dhe rezonancës magnetike. Ekzaminimet kanë përcaktuar se ai do të ketë nevojë për rreth tre javë rikuperim dhe për këtë arsye nuk mund të jetë në dispozicion të Maranit për ndeshjet e Kombëtares.