Presidenti i Kolumbisë, Gustavo Petro, i rrëfeu BBC-së se beson që “kërcënimi për aksion ushtarak të SHBA-së kundër vendit të tij, ekziston vërtet. Shtetet e Bashkuara, tha ai, po i trajtojnë vendet e tjera si pjesë të një “perandorie” amerikane dhe i akuzoi po ashtu agjentët e Shërbimit Amerikan të Emigracionit dhe Doganave (ICE) se po veprojnë si “brigada naziste”. Trump i ka zgjeruar ndjeshëm operacionet e ICE-it si pjesë e asaj që administrata e tij e quan një goditje kundër krimit dhe emigrantëve që kanë hyrë ilegalisht në SHBA. Komentet e Gustavo Petros vijnë pasi Trump e kërcënoi Kolumbinë me veprime ushtarake. Në vazhdën e sulmeve amerikane ndaj Venezuelës dhe kapjes së Nicolás Maduro-s, presidenti amerikan qe shprehur se një operacion ushtarak që shënjestron Kolumbinë “tingëllon mirë”, e i ka thënë vazhdimisht Petros që të “ruajë kokën”, komente këto që Petro i dënoi ashpër, e u shpreh se SHBA rrezikon të shndërrohet nga një vend që “dominon globin” në një vend “të izoluar nga bota”. BBC thotë se i është drejtuar Shtëpisë së Bardhë për koment. Trump dhe Petro folën në telefon të mërkurën në mbrëmje, pas së cilës Trump tha se do të takohej me homologun e tij kolumbian në Shtëpinë e Bardhë në një “të ardhme të afërt”. Por ton ii Gustavo Petros së fundi la të kuptohej se nuk ka ndonjë përmirësim të ndjeshëm të marrëdhënieve mes tyre. Presidenti Trump shpesh ka fajësuar emigracionin për krimin dhe trafikimin në SHBA, duke e përdorur këtë për të justifikuar operacione të gjera zbatimi të ligjit, dhe ka akuzuar vende si Kolumbia dhe Venezuelën se nuk po bëjnë mjaftueshëm për të luftuar trafikun e drogës.