Operacioni i koduar Eureka i policisë italiane kundër mafias Ndragheta ka çuar në pranga 108 persona, nga 150 të shpallur në kërkim në 8 vende të Europës. Sipas mediave italiane ky është padyshim operacioni më i madh i kryer ndonjëherë kundër mafies, në të cilin u përfshinë më shumë se një mijë policë në Gjermani dhe tre mijë në Itali, ndërkohë që kontrolle ka pasur edhe në Spanjë, Portugali, Francë, Rumani dhe Slloveni. Të arrestuarit janë nën hetim për trafik ndërkombëtar droge në sasi të mëdha, pastrim parash, grup të strukturuar kriminal dhe trafik armësh. Prokurorët hodhën dritë për lidhjet e tyre dhe dolën në konkluzionin se pjestarët e grupit mafioz furnizoheshin me kokainë nga Amerika e Jugut dhe në më pak se 2 vite futën 6 ton kokainë në Itali. Sipas hetuesve një nga bandat furnizohej me kokainë nga Amerika e Jugit nga shqiptari Denis Matoshi (Eldi Dizdari) i cili aktualisht është në arrati në Dubai. Matoshi sipas autoriteve italiane, është udhëheqës i grupit kriminal shqiptar (KOMPANIA BELLO) – një sindikatë transnacionale e krimit të organizuar e përfshirë në trafik droge dhe operacione kontrabande midis Amerikës së Jugut dhe Evropës me një vlerë prej 350 milion euro. Ai u arrestua në Dubai, por pas lirimit të tij, është ende e paqartë nëse autoritet italiane do vijojnë të kërkojnë esktradimin e Dizdarit në Firence, aty ku një pjesë e grupit të kokainës pak kohë më parë morën dënime nga drejtësia italiane, por deri më tani Italia nuk ka marrëveshje ekstradimi me Emiratet e Bashkuara Arabe. Grupet e trafikut të kokainës do të pastronin rreth 22.3 mln euro, të gjitha këto të ardhura nga krimi. Milionat euro të ‘Ndrangheta-s do të ripërdoreshin pjesërisht për blerjen e makinave dhe mallrave luksoze, si dhe do të përdoreshin për të filluar dhe financuar aktivitete tregtare në Francë, Portugali dhe Gjermani. Hetimet kanë nisur që nga qershori i vitit 2019. Hetuesit zbuluan funksionimin e tre bandave kriminale që synonin trafikun ndërkombëtar të drogës, të cilat i kishin bazat e tyre në Itali si dhe jashtë saj. Pamjet: AFP