Operacioni antidrogë i koduar "KEPI I VOZAJVE" vuri në pranga 14 persona të një grupi kriminal që prodhonin e shisnin lëndë narkotike në zonën e Matit. Pikërisht personi që kishte si detyrë të kontrollonte territorin për të mos lejuar veprimtari të jashtëligjshme, kryeplaku i fshatit Lam i Madh në Dibër, Gëzim Koleci, organizoi sëbashku me dy djemtë e tij e të afërm të tjerë një grup kriminal për kultivimin e kanabisit. Nga hetimet e kryera ka rezultuar se organizotar i kësaj veprimtarie është shtetasi Gëzim Koleci, i cili ka mbajtur dhe detyrën e kryetarit të fshatit Lam i Madh ku nëpërmjet personave të lartëpërmendur, me të cilët ka lidhje familjare dhe fisnore, organizonte punën për kultivimin e lëndëve narkotike, përpunimin e saj dhe më pas gjetjen e tregut për shitje, të cilën e siguronte nëpërmjet djemve të tij shtetasve Vilson dhe Gestian Koleci, të identifikuar edhe si transportues të saj. Personat e arrestuar akuzohen për kultivim të bimëve narkotike, prodhim dhe shitje, mbajtje të armëve shpërthyese dhe municione. Disa prej këtyre armëve janë sekuestruar sëbashku me 13 telefona celular që përdoreshin nga të arrestuarit.