Lideri i Partisë Demokratike të Socialistëve në Mal të Zi, Millo Gjukanoviq, ka dhënë dorëheqje nga pozita e kreut të partisë. Sipas mediave malazeze bëhet me dije se Gjukanoviq e ka bërë të ditur këtë vendim në një sesion të partisë në pasditen e së mërkurës, dhe se një takim i kryesisë së partisë është caktuar për 6 prill, kur do të formalizohet vendimi. Gjukanoviq ka dhënë dorëheqje nga pozita e liderit të partisë vetëm tri ditë pasi humbi në zgjedhjet presidenciale ndaj Jakov Millatoviqit nga Lëvizja Evropa Tani. Gjukanoviq ka qenë presidenti i DPS-së prej vitit 1998, kur e ka marrë pushtetin nga presidenti paraprak, Momir Bullatoviq. Ai ka udhëhequr Malin e Zi si president ose kryeministër që nga viti 1991 si dhe është një nga figurat kryesore në pavarësinë e vendit nga ish-Jugosllavia. Ish-presidenti gjithmonë ka advokuar për integrimin evropian dhe euro-atlantik të vendit të tij, ndërsa ka ngritur zërin kundër influencave ruse dhe serbe. Por, në zgjedhjet e fundit ai arriti të merrte vetëm 40% të votave, ndërsa pjesëmarrja në zgjedhje ishte në nivele rekord. Gjukanovic uroi kandidatin e tij dhe tha se nëse kandidatura e tij është ajo që qytetarët mendojnë se i duhet vendit, ai e mirëpret atë. Gjukanoviq do të zëvendësohet si kryetar partie nga udhëheqësi aktual i klubit parlamentar të DPS-së, Daniel Zhivkoviq.