Në një prej rasteve të reflektuara në dosjen e hetimeve të shkeljeve tek departamenti Onkologjik, tregohet se si disa prej mjekëve të Onkologjikut dërgojnë në klinikën private “Megis” një paciente nga Burreli, duke e trajtuar situatën si alarmante. Në dosjen e siguruar nga gazetarja e Top Channel, shkruhet se qytetari i cili kishte nënën të sëmurë, e solli te Spitali Onkologjik, pasi mjekët në Burrel i thanë se vetëm aty bëhen vizita për sëmundjen e saj. Teksa prisnin në radhë, atyre u është afruar Emiljano Lela, Koordinator pranë Spitalit Onkologjik në QSUT dhe i ka pyetur nëse donin që t’i ndihmonte. Sikurse thuhet në dosje, Lela e ka dërguar pacienten te mjeku Edmond Gashi, që pasi i ka bërë kontroll sipërfaqësor, e ka alarmuar, duke i thënë se është në gjendje të rëndë dhe duhet të hyjë në operacion sa më parë. “Vizitat në vijim do t’i bëjmë në Astir, në klinikën Megis, pasi këtu në spital ka shumë vonesa dhe puna nuk pret”, është shprehur Gashi. Pacientja ka kryer biopsinë në klinikën private të mjekut dhe një muaj më vonë ka kryer operacionin, për të cilin ka paguar 2500 euro. Pikërisht pas ndërhyrjes, mjekët i kanë treguar se tumori nuk ishte i keq dhe nuk ka nevojë më për trajtim, por për çudi, një tjetër mjek në të njëjtën klinikë i tha të bënte kimioterapi. Pas hetimeve të bëra, u caktua masa arrest shtëpie për Edmond Gashi, ndërsa për koordinatorin Emiljano Lela u vendos masa detyrim paraqitje.