Brukseli paralajmëron Serbinë se mund t’i bllokojë anëtarësimin në Bashkimin Evropian, nëse presidenti Aleksandër Vuçiç merr pjesë në Paradën e Fitores më 9 maj në Moskë. Mediat ruse raportuan se Aleksandar Vuçiç do të ishte një nga personalitetet e huaj të pranishme, si dhe do të kontribuonte me pajisje ushtarake në spektaklin e 9 majit. Në përgjigje, zyrtarët evropianë e paralajmëruan Vuçiç se vizita e tij do të ishte një shkelje e kritereve të anëtarësimit të bllokut dhe do të prishte ambiciet e vendit të tij për në Bashkimin Evropian. "Ne duhet të sigurohemi që ata të kuptojnë se disa vendime vijnë me një kosto", tha Jonatan Vseviov, sekretari i përgjithshëm i ministrisë së punëve të jashtme të Estonisë, duke shtuar se "Pasoja është që ata të mos anëtarësohen në Bashkimin Evropian". "Rusët kanë punuar shumë për të bindur njerëzit të marrin pjesë... Për ne kjo do të jetë një provë e rëndësishme. Në thelb ajo që ne shikojmë është nëse ata janë apo jo në anën tonë apo luajnë në ekipin tjetër", u shpreh zyrtari i lartë i Estonisë. Kaja Kallas, diplomatja më e lartë e jashtme e bllokut, tha se ministrat e jashtëm të BE-së kishin diskutuar shtetet anëtare të ardhshme që do të merrnin pjesë në ceremoninë në Moskë, në një takim të hënën. “Ajo që u diskutua gjithashtu shumë qartë, dhe u tha nga shtete të ndryshme anëtare, është se çdo pjesëmarrje në paradat ose festimet e 9 majit në Moskë nuk do të merret lehtë nga pala evropiane, duke pasur parasysh se Rusia po zhvillon një luftë në shkallë të plotë në Evropë”, u tha ajo gazetarëve pas takimit. Serbia ka aplikuar për t'u bashkuar me Bashkimin Evropian në vitin 2009 dhe u bë kandidate për anëtarësim në vitin 2012, por vijon të mbajë raporte të ngushta me Rusinë. Bisedimet për pranimin e Serbisë kanë ngecur vitet e fundit, për shkak të mbështetjes së saj të dukshme për pushtimin e paligjshëm të Ukrainës nga Rusia. Beogradi ka refuzuar të miratojë sanksione perëndimore kundër Rusisë në përgjigje të luftës, të cilën shumica e shteteve anëtare të Bashkimit Evropian e kërkojnë si kriter për anëtarësim.