Kombëtarja shqiptare vijon përgatitjet në “Shtëpinë e Futbollit”, ndërsa trajneri Rolando Maran po punon për të ndërtuar formacionin që do të zbresë në fushë të shtunën ndaj Bjellorusisë. Ideja kryesore pritet të jetë një Shqipëri me katër mbrojtës dhe një mesfushë me tre lojtarë, me Maranin që kërkon presing, intensitet dhe dalje të shpejtë në sulm. Në portë, rikthimi i Etrit Berishës e bën atë kandidatin kryesor, ndërsa në mbrojtje, nëse Balliu nuk rikuperohet, Hysaj pritet të marrë krahun e djathtë, me Gjimshitin, Ismajlin dhe Mitajn si alternativat më të forta për katërshen e prapavijës. Në mesfushë, mungesat e Qazim Laçit dhe Adrion Pajazitit i kanë reduktuar alternativat. Kristjan Asllani dhe Ylber Ramadani duken të avantazhuar për një vend titullari sëbashku me Julian Shehun ndërsa janë edhe disa alternativa të reja, mes tyre edhe Feta Fetai, i thirrur pas dëmtimit të Laçit, dhe Klevi Qefalia, që zëvendësoi Pajazitin. Në repartin ofensiv, rikthimi i Rey Manajt i jep Maranit një pikë referimi në qendër të sulmit. Në krahë, Muçi, Hoxha, Mehmeti, Seferi dhe Uzuni janë alternativat që mund të plotësojnë treshen sulmuese, me zgjedhjen që do të varet edhe nga ideja e trajnerit për presingun dhe shpejtësinë në tranzicion. Pra, një variant i mundshëm do të ishte Berisha në portë; Hysaj, Gjimshiti, Ismajli e Mitaj në mbrojtje; Asllani, Ramadani dhe Shehun në qendër; ndërsa në sulm Manaj me Hoxhën dhe Muçin nga krahët. Mungesat kanë krijuar probleme për Maranin që në start, por njëkohësisht i japin mundësinë talenteve të rinj si Fetai e Qefalia të fitojnë hapësirë në një Kombëtare që kërkon ta nisë me fitore këtë aventurë në Ligën e Kombeve.