Fondi Ndërkombëtar Monetar parashikon se për vitin 2024 ekonomia shqiptare do të rritet me 3.3%. Në raportin e hartuar, FMN thekson se dhjetë muajt e parë të vitit që lam pas kanë sjellë një pozicion fiskal shumë më të përmirësuar në vend. Ku një rol të madh patën eksportet e larta të shërbimeve, investimet e huaja direkte si dhe remitancat. Faktorë këto që sollën një përmirësim të pozicionit të llogarisë korente dhe mbiçmim të Lekut. Në parashikimin për perspektivat e rritjes, FMN projekton që “rritja, ndonëse më e moderuar, parashikohet të mbetet e fortë, mbështetur nga kërkesa në shërbime dhe investimet e huaja direkte”. Sa i përket bilancit të llogarisë korente, FMN vlerëson se është në rrugën e duhur për t’u përmirësuar në vitin 2023, ndikuar nga flukset e forta hyrëse të lidhura me turizmin. Gjithashtu, Fondi Monetar Ndërkombëtar vëren se perspektiva e anatarësimit në BE mund të ofrojë një shtysë shtesë për të adresuar sfidat strukturore afatgjata. Ekonomia shqiptare është shfaqur si një nga performuesit më të fortë në rajon, konstaton Fondi Monetar Ndërkombëtar, duke shtuar se roli në rritje i turizmit ka shtuar besimin te perspektiva ekonomike e vendit.