Klubi Dinamo ka reaguar pas vrasjes të 14-vjeçarit në afërsi të shkollës Fan Noli në Tiranë. 14-vjeçari ishte pjesë e skuadrës U-15, por ëndrrat iu prenë në mes pas një sherri banal me bashkëmoshatarët e tij. Klubi Dinamo shpreh ngushëllimet për adoleshentin. “Jemi thellësisht të tronditur nga lajmi tragjik për ndarjen e parakohshme nga jeta të lojtarit tonë Martin Cani, pjesë e skuadrës U-15.Presidenti Adrian Bardhi dhe klubi FC Dinamo City i shprehin ngushëllimet më të sinqerta familjes Cani dhe i gjenden pranë në këto momente shumë të vështira. U prehsh në paqe Martin!”, shkruhet në një njoftim të bërë në Facebook. Ngjarja e rëndë tronditi opinionin publik këtë të hënë. Pas mbarimit të mësimit, i mituri humbi jetën për shkak të një konflikti me bashkëmoshatarët me thikë. Policia njoftoi për përfshirjen e tre 14 vjeçarëve në sherrin me fund fatal në një rrugicë 300 metra pas shkollës, por dëshmitarët flasin për një përsëritje të dhunës të nisur që të premten, madje sipas tyre, me numër më të shumtë nxënësish që ziheshin në grup. Nga sherri edhe një tjetër adoleshent është i plagosur dhe gjendet ende nën kujdes mjekësor. Autorët e mitur që dyshohet të kenë ngulur thikën, njëri mësohet të jetë larguar pas ngjarjes për mjekim në spital privat, e tjetri është shoqëruar në polici.