Pas skandalit të zbuluar në spitalin e Onkologjikut, ka reaguar për herë të parë publikisht mjeku i akuzuar, Edmond Gashi. Në një postim në Facebook, bërë në orët e vona të mbrëmjesh së të premtes, ai shprehet se ndaj figurës së tij po hidhet baltë dhe se duhet t’i lihet në dorë drejtësisë të zbardhë të vërtetën. Ai shkruan se edhe mjekët gabojnë, por shton se ai u është përgjigjur pacientëve dhe se “jeton me vuajtjet e tyre”. Sipas tij është e drejta e pacientit të zgjedhë të shkojë në klinikë private, dhe se ai ka detyrim t’i përgjigjet. Mjeku i akuzuar shkruan se ka bërë detyrën e tij, të njëjtë që nga momenti që është betuar për bluzën e bardhë, teksa shton se mjeku nuk di ta mbyllë telefonin apo derën e dhomës së vizitave e konsultave. “Mjeku nuk ka orar pune, por përgjigjet atëherë kur pacienti e kërkon që të luftojnë të dy së bashku sëmundjen. Si mjek kirurg kam përballuar numrin më të madh të ndërhyrjeve kirurgjikale në spitalin publik dhe 90% e tyre janë operacione të suksesshme. I ka të dhënat Onkologjiku dhe QSUT-ja, verifikojini dhe binduni për çdo dyshim. Distancohem ndaj çdo tendence keqpërdorimi të emrit tim nga interesa të mirëfillta okulte. Le t’ia lëmë hetimit të zbardhë të vërtetën, besimi im ndaj institucioneve ka qenë dhe mbetet primar. Jo pa qëllim ditën e djeshme unë kam mbërritur para ambienteve të Gjykatës në orarin e përcaktuar nga kjo Gjykatë, duke iu përgjigjur hetimit dhe institucioneve”, shkruan ai. Gashi shprehet se po mundohet të denigrohet figura e një mjeku profesionist, teksa vijon më tej me reagimin.