Qeveria parashikon dyfishimin e bonusit mujor për pensionistët nga 1 janari i vitit të ardhshëm. Masa do të zbatohet për të gjitha kategoritë e pensioneve, ndërsa paralelisht do të vijojë edhe indeksimi i tyre. Vendimin e bëri të ditur ministrja e ekonomisë, Delina Ibrahimaj. “Në vitin 2026 nisëm bonusin mujor, ndërsa nga 1 janari 2027 ai do të dyfishohet për të gjitha kategoritë e pensionistëve, krahas vijimit të indeksimit të pensioneve.” Për financimin e kësaj skeme, në projektbuxhetin e vitit 2027 janë parashikuar 22.4 miliardë lekë shtesë. Bonusi mujor, i aplikuar për herë të parë këtë vit, varion aktualisht nga 600 deri në 1 mijë e 800 lekë, në varësi të kategorisë së pensionit. Sipas qeverisë politika e re e mbështetjes synon që deri në vitin 2030 pensioni i plotë të arrijë në të paktën 40 mijë lekë, ndërsa pensioni i pjesshëm në të paktën 22 mijë lekë.