Një vajzë bionde është përdorur nga policia, krahas 3 personave të tjerë, për të futur në kurth shumë prej të arrestuarve të operacionit "Summer", që çoi në pranga 15 persona dhe shpalli në kërkim 3 të tjerë. Këtë fillimjave të ndaluarit me urdhër të prokurorisë dolën para gjykatës për caktimin e masës së sigurimit personal, ndërsa akuzohen për veprimtari kriminale në fushën e narkotikëve dhe armëmbajtjes pa leje. Jashtë ambienteve të gjykatës familjarë të dy prej të ndaluarve, babë e bir, krijuan një situatë të pazakontë për të cilën u desh ndërhyrja e policisë. Pas një seance që zgjati mbi 3 orë, gjyqtari Shkëlzen Liçaj urdhëroi lirimin e menjëhershëm të 11 prej të prangosurve, 7 prej të cilëve u lanë në masën arrest në shtëpi dhe 4 të tjerë detyrim paraqitjeje. Gjykata caktoi masën e sigurisë Arrest në burg për Zamir Hoxhën, Klodian Sehitin, Xhuljano Xhaferrin dhe Mehmet Metën. Gjatë seancës prokurori Elidon Hysenaj dha detaje nga hetimi dymujor dhe kërkoi masën e sigurisë Arrest në burg për të gjithë të prangosurit. Prokurori deklaroi se burimet konfidenciale u vunë në lëvizje për të kryer blerjet e simuluara dhe dokumentuar veprimtarinë e paligjshme të personave qe shisnin për 2000-6000 lekë një dozë kokainë dhe më pak dozat e hashashit. Po shumë prej avokatëve mbrojtës deklaruan se këto blerje nuk duhen konsideruar si provë, pasi janë provokime që në përballje me nevojën për para i bën përdoruesit apo personat në kushte të vështira ekonomike të shesin dozat e tyre, apo të vihen në lëvizje për t'i siguruar ato për të siguruar para.