Sekretari amerikan i shtetit Antony Blinken mbërriti në Tel Aviv për bisedime me zyrtarë të Autoritetit Izraelit dhe Palestinez si dhe me lidere të tjerë rajonalë, pas marrëveshjes së armëpushimit të javës së kaluar midis Izraelit dhe Gazës. Si pjesë e një udhëtimi treditor, Blinkeni viziton Izraelin, Bregun Perëndimor, Ramallahun, Kajron dhe Amanin. Të parin, ai takoi kryeministrin izraelit Benjamin Netanyahu, të cilit i përcolli mesazhin se do të nevojitet shumë punë për të rivendosur shpresën, respektin dhe besimin mes komuniteteve, por edhe edhe ia bëri sërish të qartë mbështetjen e padiskutueshme amerikane për shtetin hebre. Ia nënvizova kryeministrit atë që presidenti Biden e ka thënë hapur përgjatë gjithë periudhës së dhunës se Shtetet e Bashkuara e mbështesin plotësisht të drejtën e Izraelit për mbrojtur veten kundër sulmeve sic janë ato mijëra raketat e lëshuara pa dallim nga Hamasi kundër civilëve izraelitë. Në axhendën e Blinken janë edhe takime me Presidentin e Autoritetit Palestinez Mahmoud Abbas, Presidentin egjiptian Abdel Fattah Al-Sisi dhe Mbretin Abdullah të Jordanisë. Më herët, Biden foli për një angazhim të hekurt për sigurinë e Izraelit, ndërsa tha se kryediplomati “do të vazhdojë përpjekjet e administratës sonë për të rindërtuar lidhjet dhe mbështetjen për popullin dhe udhëheqësit palestinezë, pas vitesh të tëra neglizhimi." Blinkeni do të diskutojë gjithashtu për përpjekjet ndërkombëtare "për të siguruar që ndihma e menjëhershme të arrijë në Gaza në një mënyrë që prej saj të përfitojnë njerëzit dhe jo Hamasi dhe për uljen e rrezikut të konfliktit të mëtejshëm në muajt e ardhshëm", shtoi Biden. Vete shefi i diplomacisë amerikane e riktheksoi edhe përmes një mesazhi në Twitter se "Shtetet e Bashkuara janë angazhuar në një diplomaci intensive për t'i dhënë fund armiqësive dhe për të ulur tensionet."