Në territorin e vendit janë raportuar gjithsej 31 vatra zjarri. Prej tyre, 5 vatra mbeten ende aktive dhe po luftohen nga ajri dhe toka, ndërsa 5 të tjera janë vendosur nën mbikëqyrje. Për të përballuar këtë valë zjarresh, në terren janë mobilizuar 319 forca operacionale dhe 24 automjete zjarrfikëse, po punojnë gjithahstu 80 efektivë të Forcave të Armatosura dhe 2 helikopterë të Forcës Ajrore, të cilët po ndërhyjnë në zonat me terren më të thyer. Vatra më shqetësuese dhe më pranë zonave urbane mbetet ajo në Malin e Dajtit, në drejtim të Qafë-Priskës, përballë zonës së Farkës. Zjarri aty vijon të jetë aktiv dhe po djeg sipërfaqe pyjore. Për shuarjen e flakëve në terren janë 15 forca zjarrfikëse, 9 punonjës të Administratës së Zonave të Mbrojtura dhe 20 efektivë të ushtrisë. Qarku i Dibrës regjistron numrin më të madh të vatrave aktive. Flakët vijojnë të jenë jashtë kontrollit në Vajkal, Lundre dhe Ballenjë. Një situatë e re dhe problematike është shfaqur në brezin Bershi–Kurdari–Patinë të bashkisë Klos, ku dy vatra zjarri aktive kanë përfshirë tashmë një sipërfaqe prej rreth 4 hektarësh. Është izoluar plotësisht vatra e madhe në Sllatinë. Në qarkun e Durrësit, zjarri që shkaktoi panik në fshatin Zallë të Fushë-Krujës është shuar plotësisht. Gjithashtu, situata në Qafën e Lugut në Vithkuq Korçë, si dhe vatrat në malin e Dardhës dhe malin e Qukësit në Elbasan, raportohen nën kontroll dhe po monitorohen nga toka për të shmangur riaktivizimin e mundshëm nga era. Disa vatra të tjera të vogla që u shfaqën gjatë 24 orëve të fundit në qarqet Tiranë, Durrës, Berat, Shkodër, Gjirokastër, Lezhë, Vlorë dhe Korçë por u shuan. Agjencia Kombëtare e Mbrojtjes Civile bën me dije se mbrojtja e jetës dhe pronës së qytetarëve mbetet prioriteti i tyre.