Zyra e Bashkimit Evropian në Kosovë, ka dënuar dhunën që ndodhi në Kuvendin e Kosovës midis deputetëve dhe ministrave të Qeverisë së Kosovës. Shefi i Zyrës së BE në Kosovë, Tomas Szunyog ka shkruar në Tëitter se sulmet fizike që kanë ndodhur të enjten janë zhgënjyese, teksa ka shtuar se Kuvendi i Kosovës nuk është vend ku mund të ushtrohet dhunë. “Skena zhgënjyese dhune janë parë sot në Kuvend. Kuvendi nuk është vend për sulme fizike, por vend për të diskutuar propozimet dhe politikat në mënyrë demokratike. Diskutimet dhe shkëmbimi i ideve janë bazat themelore të një demokracie”, shkruhet në postimin e tij. Në lidhje me këtë ngjarje ka reaguar edhe presidentja e Kosovës, Vjosa Osmani, e cila tha se përdorimi i dhunës si mjet për të adresuar pakënaqësitë e mospajtimet politike është dëmi më i madh që mund t’i bëhet institucioneve. “Kuvendi është gurthemeli i shoqërisë sonë demokratike, ku zëra të ndryshëm bashkohen për t'i përfaqësuar interesat e qytetarëve, ndaj dhuna nuk ka vend në tempullin e demokracisë dhe nuk mund të shndërrohet në mjet politik”, shkroi ajo në Facebook. Partia në pushtet, Lëvizja Vetëvendosje (LVV), i cilësoi deputetët e PDK-së “si një bandë rrugaçësh” dhe shtoi se ky sulm erdhi si veprim i koordinuar mes degëve të ndryshme të së njëjtës bandë. Pamjet: AFP