Shefi ekzekutiv i Ryanair beson se në bordin e avionit që u detyrua të ndryshonte drejtim dhe të ulej në Minsk, kishte agjentë të KGB-së bjelloruse. Në një intervistë për Newstalk Breakfast, Michael O’Leary, tha se duket qe autoritetet kishin qëllimin e qartë të ndalonin gazetarin 26 vjecar Roman Protasevich dhe partneren e tij, e për këtë arsye, u ndryshua kursi i avionit. Vendet perëndimore shprehën indinjatën e tyre të thellë ndaj kësaj ngjarje. Ate që ndodhi me avionin, Bashkimi Europian e përshkroi këtë praktikisht si një “rrëmbim”, ndërsa Shtetet e Bashkuara folën për një akt shokues. Fluturimi FR4978 kishte për destinacionin Vilniusin e Lituanisë, kur papritur ndryshoi drejtim drejt Minskut gjoja për shkak të një lajmërimi për bombë në bord. E gjithë kjo u bë në fakt për të arrestuar aktivistin bjellorus Protasevich që ishte nisur e avionin e Ryanair nga Athina. Dëshmitarët thonë se ai dukej i tmerruar dhe thoshte se në vendin e vet e priste dënimi me vdekje. Protasevich, administrator i rëndësishëm i kanalit Telegram NEXTA Live, i cili ka mbuluar protestat që shpërthyen në Bjellorusi pas zgjedhjeve të diskutueshme presidenciale gushtin e kaluar, u mor nga policia menjëherë pasi avioni u ul në kryeqytetin bjellorus. Në bordin e tij nuk u gjet asnjë bombë.