SPAK ka reaguar zyrtarisht në lidhje me arrestimin mëngjesin e sotëm të Ilir Beqajt dhe bashkëpunëtorëve të tij, që akuzohen për shpërdorim të fondeve të BE për SASPAK. Në një njoftimin zyrtar SPAK sqaron rolet dhe mënyrën sesi është abuzuar dhe përfituar nga fondet , faturat fiktive dhe tenderat “e fryrë”. GJKKO ka lëshuar masat “Arrest në burg”, për tre persona, “Arrest në shtëpi”, për dy persona, “Detyrim për tu paraqitur në policinë gjyqësore” për dy persona të tjerë nën hetim, të dyshuar për kryerje të veprave penale: Korrupsioni pasiv dhe aktiv i funksionarëve të lartë shtetërore, fshehja ose deklarimi i rremë i pasurive, Mashtrimi kryer në bashkëpunim, me pasoja të rënda dhe Shkelja e barazisë së pjesëmarrësve në tendera apo ankande publike, kryer në bashkëpunim. SPAK bën me dije se hetimet në kuadër të këtij procedimi penal janë realizuar në bashkëpunim me strukturat e Byrosë Kombëtare të Hetimit (BKH). Në analizë të provave të grumbulluara deri në këtë fazë të hetimit ka rezultuar se: Ilir Beqaj në cilësinë e Drejtorit të Përgjithshëm të SASPAC duke vepruar si urdhërues në bashkëpunim me personin nën hetim Ermal Kurtulaj, dyshohet se kanë kryer procedura prokurimi fiktive në kundërshtim me rregullat financiare. Veprimet janë të përsëritura dhe arrijnë shifra të larta.