Apeli i Gjykatës së Posaçme la në fuqi vendimin e Shkallës së Parë për të lënë përjetësisht në burg Redjan Rrajën si dhe dënimin me 35 vite burg të bashkëpunëtorit të tij Ariol Halili, të akuzuar për atentatin ndaj ish-prokurorit Arjan Ndoja, ngjarje e ndodhur më 1 nëntor të vitit 2019 në Shkozet, ku mbeti i vrarë shoferi i tij Andi Maloku dhe u plagos Aleksandër Laho, i njohur ndryshe si Rrumi i Shijakut. Vendimi u mor nga treshja gjykuese e përbërë nga Iliriana Olldashi, Dhimitër Lara dhe Nertina Kosova pas veprave të rënda penale që rëndojnë mbi ta, si vrasjen e funksionarëve publik, mbetur në tentativë, vrasje në rrethana të tjera cilësuese, krijimi i grupit të strukturuar kriminal, vjedhje por edhe armëmbajtje pa leje. Redjan Rraja dhe Ariol Halili janë të vetmit të dënuar deri më tani për atentatin tek mbikalimi i Shkozetit, ndaj ish-prokurorit Arjan Ndoja, ndërsa anëtarët e tjerë të grupit kriminal që bashkëpunuan me ta po gjykohen, pasi u zbuluan fal çkodimit të bisedave përmes aplikacionit SKY ECC. Sipas SPAK, porosinë për vrasjen e dha Plaurent Dervishaj, ndërsa Ramazan Rraja, Bashkim Haxhija, Julian Meçaj, Bledar Polovina, Genti Nderjaku, Julian Pjetri, Endrit Sinani, Amar Shkëmbi, bashkëpunuan me Redjan Rrajën e Ariol Halilin për të vënë në zbatim planin për eleminimin e avokatit Ndoja, por edhe Rrumit të Shijakut. Për të nëntë anëtarët e tjerë të grupit, gjykimi vijon.