Sali Berisha po vijon përpjekjet për t’I shpëtuar drejtësisë. Pasi SPAK depozitoi pranë Kuvendit kërkesën për arrestimin e tij, ish-kryeministri ka mobilizuar deputetët mbështetës dhe ka bërë një padi në gjykatën Kushtetuese, ku kërkon pezullimin e vendimit të Gjykatës së Posaçme. Kërkesa u depozitua pranë organit më të lartë gjyqësor nga deputeti Oerd Bylykbashi dhe përfaqësuesit ligjor të grupit të rithemelimit, Ivi Kaso dhe Franc Nuri. Demokratët pretendojnë se masa detyrim paraqitje ndaj Sali Berishës për çështjen e kompleksit Parizani është antikushtetuese pasi nuk është marrë paraprakisht vendimi I Kuvendit. Për këtë arsye ata kërkojnë dhe zgjidhjen e konfliktit të kompetencave ndërmjet Kuvendit dhe SPAK sa I takon çështjes së heqjes ose kufizimit të lirisë së Deputetit. Ndërkohë menjëherë pas kësaj lëvizje, Berisha mblodhi Kryesinë dhe vendosi që ditën e hënë, kur dhe përcaktohet fati mbi imunitetin e tij në Mbledhjen e Këshillit të Legjislacionit, të zhvillohet protestë. Po ashtu protesta do të ketë dhe ditën e enjte kur do të zhvillohet dhe seanca e fundit parlamentare për këtë sesion, ku do të votohet kërkesa e SPAK për lejen e arrestimit të Berishës. Për ish kryeministrin shpëtimi I vetëm duket se është mosbindja civile.