Në një intervistë me rrjetin amerikan ABC News, aktori Alec Baldwin ka thënë dje se nuk ndjehet fajtor për vrasjen e Halina Hutchins në sheshxhirimin e filmit "Rust". Ai tha se kishte nisur të mbushte pistoletën por nuk kishte tërhequr këmbëzën e saj. "Besoj se dikush është përgjegjëss për atë që ndodhi, por nuk e di se kush. E di që nuk jam unë”, tha aktori në intervistën e parë mbi tragjedinë. Madje Baldwin dukej se i vinte fajin vetë viktimës Halyna Hutchins, për faktin që u qëllua për vdekje. “Unë e mbajta armën aty ku ajo më tha ta mbaja, kjo ishte tamam poshtë sqetullës së saj. Këtë më thanë të bëja, nuk e di ...”, tha Baldwin. Por sipas mediave amerikane kishte “tepër gjëra që Baldwin nuk i dinte”. Ish-agjenti i FBI, Bobby Chacon, i cili tani punon si konsulent sheshxhirimi në Hollywood, tha: “Plumbi doli nga gryka e asaj arme që ishte drejtuar pikërisht ndaj saj. Plumbi nuk merr kthesa, këtu nuk jemi si te ‘Matrix.’ Duhet të tërhiqet këmbëza që të lëshohet plumbi”.