Shtetet e Bashkuara reaguan me këshillën që të respektohet procesi gjyqësor dhe sundimi i ligjit, pasi Kosova ngriti zyrtarisht aktakuzën për sulmin e armatosur të 24 shtatorit të Banjskë të Zveçanit. “Ne inkurajojmë për respektimin e procesit gjyqësor dhe të sundimit të ligjit dhe për durim, ndërkohë që ky rast i ndërlikuar procedohet në gjykata. SHBA-ja vazhdon të mbështesë me forcë sundimin e ligjit, drejtësinë e barabartë dhe qeverisjen e mirë në Kosovë”, tha një zëdhënësi i DASH për REL. Ai shtoi se SHBA pret po ashtu që Serbia të kërkojë përgjegjësi të plotë për personat e përfshirë në ngjarjen e rëndë të shtatorit të vitit të kaluar, kur një grup serbësh të armatosur sulmuan Policinë e Kosovës në veri, duke vrarë efektivin Afrim Bunjaku. Gjatë përleshjeve, u vranë edhe tre sulmues serbë. Kosova e konsideron këtë sulm si terrorist, ndërsa liderët shtetërorë akuzojnë shtetin e Serbisë për organizim të sulmit. Ngritja e aktakuzës për sulmin e banjskës u përshendet nga Bashkimi Europian, i cili insistoi se përsonat përgjegjës për të, duhet të përballen me pasojat. Organizimin e sulmit e ka marrë përsipër ish-nënkryetari i Listës Serbe, Milan Radoicic, i cili besohet se gjendet në Serbi.