Tri ditë para fillimit të Lojërave Olimpike, ministri i Brendshëm i Francës përshëndeti forcat e rendit për punën e tyre të palodhur. Ai tha se përkushtimi i oficerëve të policisë do t’i lejojë Francës të ketë sukses edhe pse “detyra nuk do të jetë e lehtë”. 30 mijë oficerë policie do të sigurojnë mbarëvajtjen e lojërave Olimpike çdo ditë dhe për ceremoninë e hapjes që do të bëhet në lumin Sena do të marrin pjesë 45 mijë forca. Në total rreth 1800 oficerë policie nga më shumë se 40 vende pritet të ndihmojnë policinë franceze. Turistët në Paris u befasuan nga dhjetëra oficerë policie të huaj që patrullonin kryeqytetin francez në ndihmë të policisë vendase përpara nisjes së Lojërave Olimpike. Më shumë se 200 policë spanjollë do të patrullojnë kryeqytetin francez, ndërsa 20 janë nga Brazili. Rreth 45 mijë policë do të garantojnë sigurinë e ceremonisë së hapjes, duke përfshirë forcat speciale. Snajperët do të vendosen në majë të ndërtesave si dhe një sistem anti-dronë.