Raporti më i fundit i Agjencisë së Inteligjencës Financiare për vitin 2025 ka nxjerrë në pah një panoramë shqetësuese të pastrimit të parave në Shqipëri, duke zbuluar shtatë skema kryesore përmes të cilave dyshohet se janë qarkulluar miliona euro me burime të dyshimta. Nga marketingu online dhe blerjet luksoze, tek investimet në pasuri të paluajtshme, kompanitë offshore dhe mashtrimet me karta bankare, raporti evidenton metoda gjithnjë e më të sofistikuara të fshehjes së origjinës së fondeve. Një nga rastet më të mëdha të evidentuara lidhet me sektorin e marketingut online. Sipas raportit, 11 kompani të regjistruara në Shqipëri kanë përfituar transferta në vlerë rreth 3.7 milionë euro nga shtete të ndryshme të Europës dhe Azisë. Të gjitha kompanitë ushtronin aktivitet në të njëjtën fushë dhe kishin lidhje mes tyre përmes administratorëve, ortakëve dhe personave me të drejtë përfaqësimi. Ajo që ka ngritur dyshime është fakti se shumica e këtyre subjekteve janë regjistruar gjatë vitit 2024 dhe janë çregjistruar brenda pak muajsh. Nga verifikimet e kryera rezulton se fondet kalonin në mënyrë të shpejtë nga një shtet në tjetrin, ndërsa shumë prej kompanive të huaja dërguese kishin deklarime financiare që nuk përputheshin me qarkullimin real të parave. Autoritetet dyshojnë se këto kompani janë përdorur si subjekte tranzitore për fshehje të ardhurash, shmangie taksash dhe pastrim parash. Rasti është referuar për hetime të mëtejshme në organet ligjzbatuese.